حرامي الرغيف (بيرم التونسي )

تسرق الرغيف يا حرامي وتتحبس شهرين!!!
لو كنت قاضي المدينه كنت أحبسك سنتين
لان ذنبك يامجرم يعتبر ذنبين
المهنه رخصتها لما سرقت رغيف
وسرقت من قبل ما تصبح وجه شريف
لا انت حرامي تشرفنا ولا انت وجيه
وياويله ما أتعسه الواقف بين البينين
تهجم عللى السرقه ليه يا أجهل الجهال
رئيس قلم حضرتك ؟ ولا مدير أعمال
السرقه يا ابن الحلال صنعه وعايزة رجال
ليهم في فض المشاكل والامور تصريف
ومن وراهم ضهور جامده وجنس لطيف
يهونوا اللي جرا ويلطفوا تلطيف
وفين تروح بالرغيف جنب الاكابر فين
اصبر على نعمتك يمكن تبقى وجيه
وجيه بمكتب وساعي بالجرس تناديه
وسكرتير زي حالي لما تشخط فيه
تتزلزل الارض والعالم يقول لطيف
والبنكنوت يتحش لك حشو في مظاريف
تلقاها بالصدفه في جيبك بدون تكليف
وتقول عجيبه يارب الظرف جاني منين !!!1