اصعب سؤال

أصعـــــــــــــــب ســـــــــــــؤال...

أصعب سؤال ) اللي جوابه للأسف مثله ( سؤال ) !!
ما هو تفلسف !! الا موقف صار واسمع " ثاني بيت"


البارحه يومه سأل : ( وش ذكرك ذيك الليال ؟ )
كان الجواب بكل بساطه : ( من متى أصلاً نسيت ؟ )


أدري بأن جمع ( الصعوبه والبساطه ) شي محال !!
لكنها صارت كذا ! واللي (( أهم )) إني دريت


إن الحياة فـ بعد أحبابك إذا جف الوصال
تعيشها لو تقتنع إنك خلااص أصبحت ( ميت !!)


يا صاحبي لو كل شي يمر بالخاطر يقال
ما كانت العبره تـولجني إليا منك طريت ؟!


شفني قدرت أحبس دموعي بس ( دمع القاف ) سال
ويا كبرها ساكت ولكن داخل أوراقي بكيت !!


عمر الحكي ما كان دافي لا ابتدى بقولة تعال
لجل اتجاهل رجفة حروفي اليا مني حكيت ..


الحال في بعدك قسم بالله ما أسميه حال
أنوي على الضحكه وأحس كلي خطأ لأني نويت ؟!


أتصور إنك من رحلت أشوفك لجسمي ظلال
لا شفته أمشي ببتعد وأثره معي مهما مشيت !!


مدام يعني في بحرك لفرحتي مليون جال
وش فيه موجك ما ركد ؟ قربت أموووت وما رسيت ..


يرضيك ما عادت معي تفرق إذا جالك مجال ؟!!
لإني اقتنعت إنك نهايه وإني ببطي ما بديت !!


صرت ( أعقد حجاجي ) إذا جابوك بـ أطراف الجدال
وأنا قبل لا قالوا اسمك كني : "ميت ثم حييت "..


تعبت أعيش الدور وأفتح للمعاذير الخيال
وأتخيل إني جيت في بالك وبأنك استحيت ..


وتردلي كلك (( وله )) وتقول : ( كن البعد طال ؟ )
ومن الفرح ما عاتبك واقول : ( ياخي مابغيت ! )


حتى وأنا أتخيل حشمتك ! لأن قلبي لا يزال
يكرر اسمك داخل اعماقي بنبضه لا سهيت ..


قلي شسوي فيك ؟ وانت بداخلي أصدق مثال
للحب واحساس القصيد ان عانق الليل وسريت ..

ربي يصبرني على الفرقا مدام الحظ مال
و انت بيجيلك يوم تعرف ليه في بعدك شكيت ..


وإذا بلاك الله وعذبك اشتياقك (( بس تعال ))
واقرى القصايد في غيابك كل ابوها بيـــت ... بيـــت ..


بتدرى ان ( أصعب سؤال ) اللي يجي رده ( سؤال )
لا قلتلي ( وش ذكرك ؟ ) ثم قلتلك ( متى نسيت ؟ )


للشاعر المبدع

محمد جار الله السهلي


راق لي فنقلته لكم