انا غنى انا غنى

مش احنا طلعنا أغنيا ؟؟؟؟ ..... اه و الله ....
لأ و ايه ؟؟؟ ..... احنا من أغنى الشعوب فى العالم كمان ....
قبل ما تقول انى ضارب بانجو ... أو عامل دماغ بنزين .... انا هفهمك ....
الحكاية و ما فيها انى كنت فى مدونة صديقة ... بس مش فاكر فى أى بوست بالظبط ... و لقيت حاجة غريبة قوى .....
لقيت ان كل واحد فينا ... (( مصروف ايده )) من قناة السويس بس .... (( سبعة دولار فى اليوم )) ....
قال و أنا اللى كنت مفكر نفسى زاحف على الروبة .....
يعنى
أنا و انت و كلنا (( مصروفنا )) سبعة دولار ..... (( دا غير اللى بتحور
فيه على الراجل الطيب أبوك ... اللى هو كمان مصروفه سبعة دولار فى اليوم ))
يعنى لما ابوك يقولك : عيب لما تبقى شحط و فى كلية و بتطلب المصروف
قوله
: طب مش عيب و انت راجل متجوز و مخلف و شغال و ربنا مديلك تاخد انت كمان
مصررف من ماما قناة السويس ؟؟؟ ..... (( بس تقول الكلمتين دول و تطلع تجرى
))
و الله دى قناة السويس دى طلعت اجدع من أبويا و امى .... اللى يوم ما ابقى حورتلهم .... باخد عشرة جنيه ....
ربنا يخليكى يا قناة السويس .... ربنا يطولنا فى عمرك يا رب ....
لأ و شوف حكمة ربنا يا أخى .... شوف حكمة ربنا ....
الناس دى خايفة على الفلوس لا تتصرف مننا .... (( و خصوصاً اننا شعب مسرف .... مسرف ولا مش مسرف ؟؟ ))
مسرف و مبذر كمان .... فبيحوشوا الفلوس لينا ....
يعنى
أنا مثلاً ... لو حسبتها ... (( و محدش يقر علشان زى ما انا معايا فلوس
انت كمان معاك )) ... هلاقى انى عايش 18 سنة ... و السنة بـ 360 يوم ...
(( نمشيها 360 )) ... و اليوم واقف عليا بسبعة دولار .... يبقى أنا ليا
عند قناة السويس حوالى .... 45360 دولار ....
اوعى بقى حد يقولى حولهم
مصرى و الكلام ده ... أنا مش فاضى للكلام ده ... أنا دلوقت بفكر انا هصرف
الفلوس دى فى ايه ؟؟؟؟ ... (( و الحمد لله ان اللى ليه حق فى البلد دى مش
بيضيع )) ....
شوفتوا بقى ؟؟ ...
علشان تعرفوا ان حكاية ان مافيش
شغل ... و ان الشباب مش لاقية فلوس تتجوز بيها ... و الناس اللى بتموت من
الجوع ... و الناس اللى ساكنين فى الشارع ... و اللى بياكلوا من الزبالة
... كل دى اشاعات مغرضه ... هدفها اشاعة الفتنة فى مصر ....
واحد مصروفه (( من قناة السويس بس )) ... سبعة دولار فى اليوم .... هيشتغل ليه ؟؟؟
واحد
مصروفه (( من قناة السويس بس )) ... سبعة دولار فى اليوم .... مستنى ايه
علشان يتجوز ؟؟ .. (( ملحوظة : العروسة كمان مصروفها سبعة دولار فى اليوم
))
واحد مصروفه (( من قناة السويس بس )) ... سبعة دولار فى اليوم .... مش راضى ياكل ليه ؟؟؟ ... ماهو فى اختراع اسمه كنتاكى ...
واحد
مصروفه (( من قناة السويس بس )) ... سبعة دولار فى اليوم ... ميشتريش شقة
ليه ؟؟ ... ولا هو يقعد يكنز على قلبه ... و اصرفى يا حكومة ؟؟
واحد مصروفه (( من قناة السويس بس )) ... سبعة دولار فى اليوم ... ياكل من الزبالة ليه ؟؟؟ .... (( الا لو هو بيتكيف كدة ))
***************************************
بس
أنا كان ليا طلب عند قناة السويس بس .... يارب كدة اشوفك فى بيت العدل
ياختى ... كنت عاوز بس اخد من السبعة دولار ... خمسة جنيه و نص كل يوم ...
علشان اجيب سندوتش فول وطعمية.... و الباقى حوشيه ليه علشان لما اتجوز بقى
................

لا لا يا جماعة ده احنا أغنية أوي مش تقولوا كده من زمان
قال ايه واحنا اللي كنا ظالمين قناة السويس
ماطلعت محترمة اهي يا جماعة أهم حاجة دعوة أخونا مصطفى يارب كده نشوفها في بيت العدل
مشكووور على الموضوع
جميل جدااااا

لا لا لا مش بالكلام يا جماعة بصوا بقة احنا نروح ونعمل جامع عند قناة السويس ونزورها بقى كل شوية وكل واحد فينا يحسب هو ليه كام عندنا حبيبتنا الغالية اه والله تستاهل نقولها حبيبتنا الغلية دول 7 دولاااااااااااار وبعدين كل مانزورها نطلب طلبات بسيطة شوية منها بس المهم الطلبات دى ماتعديش اللى لينا عنها لاحسن انا عارفة المصريين يحبوا يصرفوا وخلاص يعنى مثلا طبعا احنا متفقين ان الشغل نازل يرف على الشباب بس تقول ايه للجيل البايز دة اذ فاجة كدة تلاقى الواد رايح يقول لست الحسن والجمال قناة السويس انا تعبت من الشغل انا عايز المرتب يجيلى اخر الشهر وانا قاع جنب مامتى وياريت تزودهولى شوية وتبعتيهولى اخر الشهر مع السواق اللى انتى هتجيبهولى طبعا انا عارفة ان قناة السويس قلبها هيوجعها وتعمله اللى هو عاوزة بس الحكومة بتاعتنا بقى تقول لاه انا عايزة شباب مصر يبقوا رجالة انا همنع عنهم ال7 دولار وهمنع عنهم الشغل عشان احطهم فى امتحان صعب واخليهم يتعلموا من خبرات الحياة (قصدها يتعلموا يلعبوا طاولة ) على القهوة شفت سر فقرنا والبطالة جت منين