دقيقة حداد

دقيقة حداد
------------
غادة عبدالعال

كل يوم تقريبا باحس إني محتاجة أقف دقيقة حداد على روح الجنيه المصري

الأصيل ..اللحلوح ..الأهيف..

مش روح الجنيه بمعناها الإقتصادي ...
الموضوع مالوش دعوة بقيمته في الأسواق العالمية (دي لوحدها عايزه 6 سنين حداد مش دقيقة واحدة) ....

لكن
الحداد على روح الجنيه الورقي الأصفر الجميل , رغم حركة المقاومة الشعبية
الواسعة للجنيه المعدني و النيك نيم بتاعه (الدينار) إلا إن إنتشاره بين
الأيادي ظاهرة تزعجني جدا..

بغض النظر عن موضوع الشخشخة و إن الواحد لو ماشي في جيبه 5 جنيه بتبقى فضيحته بجلاجل ..
و بغض النظر أيضا عن إن كل يوم الواحد بيصرفه بمنتهى البراءه على إنه 10 أو 20 قرش ..

إلا إن موقفي منه مالوش دعوة بالحاجات دي ..هو مش موقف منه قد ما هو حسرة على الجنيه البديل ..
الجنيه الأصفر المشارك للمصريين في أفراحهم و أحزانهم و أكلهم و شربهم ..
الجنيه المصري اللي أثبت علميا إنه أعجوبه بين عملات الدول..
عملة ليها ذاكرة و شايلة تاريخ ..
مين فينا ما مسكش في يوم جنيه و عرف من بقع الزيت الحار فوقه إن أحد ملاكه السابقين شارك في دعم الصناعة الوطنية لقدر الفول؟..

مين فينا مالاحظش فوقه آثار كمية من العرق تؤكد إن الجنيه ده جه بطلوع الروح و من تحت ضرس اللي صرفه ..

مين فينا ما قراش في يوم عليه رأي سياسي ..
تهنئة بعيد ميلاد ..
رقم تليفون..
عنوان بيت..
حسبة مصروف الشهر ..
لستة طلبات من السوق ..
بيت شعر ..
مثل شعبي....
شكوى من زوجة نكدية..
شتيمة في رئيس شغل ..
إعتراف حب خجول من مراهق قرر يفضح نفسه و اللي بيحبها و يخللي أساميهم تلف بين أيادي اللي يسوى و اللي ما يسواش ..

سطح الجنيه الأصفر كان هايد بارك لبعض المصريين ..ما بيكتبوش الكلام ده على النص جنيه (شكلها مايشجعش)..
ولا
الخمسة جنيه (بتصعب عليهم..مبلغ برضه) ولا العشرة و لا العشرين و لا
الخمسين و لا المية (و مين معاه المبالغ الخيالية دي أساسا)..

لكن الجنيه ..حمال الأسيه اللي طول عمره معانا ع الحلوة و المرة نتنازل عنه بسهولة كده؟..

الأول الشلن و البريزه
و بعديها جه الربع جنيه اللي ماحدش عارف إشمعنى يعني هو اللي عاملينه مخروم و كانت حادثة و الا عيب خلقي والا إيه بالظبط ؟..

النص جنيه ..مش قضية ماتلزمناش قوي..

لكن الجنيه الورقي الأصفر الجميل..نعوض دوره إزاي؟..
جزء من ذاكرتنا ووسيلة تنفيس أخرى بتنتزع مننا و مش هنعرف نعوضها تاني..

و لذلك أدعوكم جميعا للإنضمام لحركة المقاومة الشعبية ....
مع الجنيه الأصفر و ضد الجنيه المعدن..
حتى نحافظ على الذاكرة المصرية الجنيهية و نحفظها من الزوال ..

و اللي مالوش خير في جنيهه..مالوش خير في حد.

الموضوع جميل
مشكور جدا
بس أنا عندى حل لحاجه كدا
بالنسبه للى عايزيشيل خمسه جنيه مثلا
علشان ميتفضحش
أنا لقيت لكم فكره وهي
السره
كل واحد يبقى شايل سورة من الدنانير
وسؤال هي سوره بالسين ولا بالصاد

دقيقة حداد

دقيقة حداد

رد: دقيقة حداد