فاطمة

فاطمة بنت ناس
يعنى إيه
يعنى ناس كويسين
برضه يعنى إيه
يعنى ناس بيعرفوا يربوا بناتهم
وماله
فيه كتير زى فاطمة وكتير زى الناس دول
عادى وطبيعى
فاطمة عيب ماتكلميش ولاد.................حاضر
فاطمة عيب ماتروحيش لصاحبتك هى اللى تجيلك....................حاضر
فاطمة بلاش تلبسى كدة وألبسى كدة ...................... حاضر
فاطمة عيب ....... فاطمة حرام .......... فاطمة مايصحش
وفاطمة بتسمع الكلام
فاطمة فضلت طول عمرها بتسمع الكلام
مقتنعة...؟؟؟
ممكن
مجبورة...؟؟؟
أكيد
فاطمة حلوة وشها حلو وتقاطيعها مسمسة

فاطمة بنت مرغوبة..........
عرسان أتقدموا من سن 15 سنة
لكن أبوها عايز يعلمها
فاطمة شاطرة فى الدراسة ومتفوقة
بسم الله ماشاء الله ..........أدب وعلم وحلاوة
فاطمة دخلت الجامعة
كلية أيه ما يفرقش معانا
فاطمة رايحة الجامعة ........... فاطمة راجعة من الجامعة
أول سنة امتياز...........برافوووووووووووو
وأول سنة أحمد فى السكة ظهر لها وحبها
فاطمة اتلخبطت
سمعت فى ودنها امها بتقولها لما جت تدخل الجامعة.......
فاطمة انتى رايحة الجامعة تتعلمى مش تتجوزى.... لو على الجواز يابنتى كان زمانك معاكى عيال ..... أحنا عايزنك جامعية محترمة.....
ماتكلميش ولاد .... ولا حد تسيبيه يكلمك ..... لا يقولك كشكولك ولا يقولك أعزمك ولا اوصلك....أوعى يابنتى
فاطمة الأول سمعت الكلام وعقلته.....ومارضيتش تكلم أحمد
بس أحمد ولد شاطر..........شعره عامله على الموضة ولبسه شيك وعنده عربية
وبيعرف يتكلم حلوووووووووووووووووووووووووو
بيعرف يرص الكلام ولا أجدع مهندس بيرص عواميد عمارة
احمد فضل ورا فاطمة لغاية ما كلمته
وفضل وراها لغاية ماأديته ريق حلو
وفضل وراها لما أقنعها انه بيتغير علشانها
وبيحضر المحاضرات علشانها
وح ينجح السنة دى علشانها
أحمد بيحب فاطمة
وفاطمة مش عارفة هى بتحبه ولا بتحب حبه
محدش قال لفاطمة اللى قاله أحمد
وح تسمعه فين ماهى طول عمرها ماكلمتش حد غريب
الأجازة جت وفاطمة فى البيت ............
بتساعد مامتها وبتتفرج على التلفزيون وبتقرى و .............
بتكلم أحمد على التليفون والنت
السنة التانية جت وفاطمة من اوائل الدفعة لكن أحمد يادوب نجح بمادة
أحمد فهم فاطمة أنه نجح علشانها والسنة الجاية ح ينجح بتفوق
فاطمة أبتدى قلبها العبيط يتحرك ناحية أحمد و...............بتحبه
أحمد عرف يلعب عليها لعبة الحب وقدر يقنعها بأنه يتجوزها
طيب روح لبابا ياأحمد
ماأقدرش دلوقتى لأنى مش جاهز
طيب وانا أعمل أيه
نتجوز دلوقتى مع بعض ولما نتخرج نعلن جوازنا
عايزنى أتجوز فى السر
وماله يافاطمة نتجوز احسن ماحد ياخدك منى
لا ياأحمد اخاف
وأحمد فضل يزن ويزن
وخلصت السنة وفاطمة مش راضية وخايفة
قلبها مع أحمد وبتحبه لكن ماتقدرش تعمل كدة
وفى الصيف جه عريس ............ فاطمة جريت تعيط لأحمد وتقوله يتقدم لها
لكن أحمد أتحجج بانه مش جاهز
بالعافية فاطمة رفضت العريس وطلعت فيه العبر
وجت سنة تالتة أول ماقابلها احمد قالها .............
مش قولتلك لازم نحجز بعد بطل ماتطيرى منى
ولقت زميلات كتير عاملين كدة
فاطمة وافقت بعد ألحاح أنها تتجوز أحمد
فاطمة بنت 18 سنة أتجوزت أحمد عرفى
فاطمة وقعت ونهايتها معروفة
فاطمة ضاعت وهى اللى ضيعت نفسها
فاطمة فاقت بس بعد ماأحمد ادها سكة وبعد ما خد اللى هو عاوزه.............

فاطمة أتخرجت
فاطمة كل عريس يجى لها ترفضه
ماهى خايفة
فاطمة غلطت
غلطت غلط كبير قوى
فاقت وحست بيه لما كبرت زيادة وعرفت قد أيه هى كانت عبيطة وغبية
فاطمة تابت وانابت وعرفت الغلطة فين
لكن فاطمة فى المجتمع مدام
لاهى مطلقة ولا هى آنسة
هى حاجة غريبة
فاطمة بنت 20 سنة ضاعت خلاص؟
مش من حقها تصلح غلطتها وتعيش حياتها بأى صورة
فاطمة يقام عليها الحد وتترجم ولا تتجلد وتتنفى من الأرض
فاطمة عملت أيه؟
أتجوزت عرفى
الله أتجوزت يعنى؟
لا بس العرفى فى السر يبقى مش جواز
وهى ايه اللى عرفها ده بنت 18 سنة
أه هى غلطانة بس مش مسئولة
أه هى تستحق ساعتها الدبح
بس ياما ما بنغلط
اه هى كانت مش كويسة
بس فاقت وعرفت الغلطة وتابت
المفروض يتعمل فيها أيه............حد يدبحها ولا تعمل هى أيه
فاطمة فيه منها 4 مليون فاطمة فى مصر
يعملوا أيه دول
ياترى لو حد جه يخطب فاطمة فيكم وأعترفت له بده يقبل يتجوزها
ياترى لو فاطمة دى أختك ولا بنتك ولا حتى قريبتك تقتلها ولا تعمل فيها أيه

حد عنده حل لفاطمة..............؟؟؟؟؟؟؟؟؟؟؟؟؟

يارب الموضوع دا يكون دمه مش تقيل
وطبعا مطروح للمناقشة
وعاوزين حل لفاطمة

والا البنت الكويسة عندها مبادئ وتعرف الغلط من الصح
نلوم اولا برضة على الاب والام
لان كلمة..بلاش.. حرام..عيب
من غير فهم لية..دة اكبر غلط منهم
ثانيا:مفيش واحدة هتعمل غلط الا لو اصحابها غلط
بس الحل الامثل: انى هى تعمل عملية ومتعرفش المواضيع دى لاحد
وتتقى الله فى جوزها

وانتهى الامر

لا طبعا ماتعملش عمليه لان العمليات الى موسووز بيقول عليها دى حرام حرام حرام
لان ده يعتبر غش للعريس الى جاى
سيبنى بعد ذلك حياتها الباقيه على الغش
يبقى هى لا نابت حاجه من الدنيا ولا من الاخره
الكلام ده لازم تعرفوه؟؟؟؟؟؟؟؟؟؟؟؟؟
وهى ممكن تصارح امها بالموضوع بالاتدريج عشان ما تكونش الصدمه صعبه على الام
واكيد الامهتقدر موقفها لان هى ام
وبعد كده الموضوع مش هيبقى صعب
ارجو الافاده لكل الشابات

مع احترامى لmosooz
مش فاهمة هو قال كدا على اى اساس
لو ده فعلا حل حضرتك يبقى كدا مفيش مشكلة اصلا
وتبقى المشكلة الوحيدة تكاليف العملية وبس
اسمحلى دا انا بسميه مشكلة المشكلة مش حلها
المشكلة فى كل مكان
وللاسف مفيش حد بيبص للحل او الدوافع او حتى الاسباب
بيبصوا بس للمشكلة وفاطمة فى نظرهم مجرمة
مش عاوزة اتكلم فى الموضوع دا
الا بعد ما نعرف وجهة نظر كل الاعضاء
واسفة مرة تانية لmosooz

هى عملت اكبر جريمة ممكنة
ودة متفق علية
أولا: البنت عملة جريمة فى حق نفسها الاول
ثانيا:عملت جريمة فى حق المجتمع والناس
الحل اللى انا قولتة فى حالة الجواز فقط
لان عمر ما شاب هيقبل يتجوز فتاة غلطت قبل كدة
لانة اى غلط ممكن يتسامح فية الا الغلط دة
وبالذات مع فتاة
وانا قولت برضة ان عمر واحدة من بيت محترم هتعمل حاجة غلط من دى
وفى الاول والاخر قدرها مكتوب
وmoszoneبيقول انها تعرف امها
لا انا بقول ان لازم امها وابوها بيعرفها
علشان يدور معاها على حل برضة
واحنا مع بعض نحاول فكر فى حل لفاطمة

برده موسووز مصر على حله جواز مش جواز الكلام ده ما لوش اسس فى الدين
بس الحل الامثل:ذى ما قلت ان هى تقول لامها الاول لان مش هتلاقى حد أحن عليها من امها
طبعا هى هتنهرها فى الاول بس هتقدر موقفها فى الاخر
لان طبعا مهما كان دى امها ودى بنتها

كلام موسزون كويس اوى بس احنا لسة ملقناش حل للموضوع
هتقول لامها بس لسة معرفناش
البنت هتتجوز ازاى ؟؟؟
لو جوزها عارف هتعيش معاة ازاى
لو مش عارف.. ازاى مش هيعرف؟؟؟
لازم نحط كل دة فى علقنا
اوحنا بفكر فى الحل

مفيش حل غير انها تقول لامها
او ممكن واحد يقدر ظروفها
لان اى حل غير كده ياما هتفضح نفسها ياما حرام هيغضب ربنا

وطبعا ذى ما احنا عارفين مفيش غلط ما بيتبعوش عواقب؟؟؟

فاطمة

فاطمة

رد: فاطمة

رد: فاطمة

رد: فاطمة

رد: فاطمة

رد: فاطمة

رد: فاطمة

رد: فاطمة